Четверг, 23 мая, 2024

Басқада

spot_img

Тоқаев алматылық оқушылармен кездесті

Мемлекет басшысы Қасым-Жомарт Тоқаев оқушылардың инновациялық шығармашылық орталығына барды, — деп хабарлайды Massaget.kz тілшісі.

Президент Қасым-Жомарт Тоқаевтың Алматы қаласына сапарының екінші күні Наурызбай ауданында орналасқан мектеп жасындағы балаларға арналған инновациялық шығармашылық орталығының жұмысымен танысудан басталды.

Орталықта оқушыларды ғылыми-техникалық, көркем-эстетикалық шығармашылыққа баулып, олардың экологиялық-ботаникалық дүниетанымын кеңейтетін, болашақ мамандығын таңдауына бағыт-бағдар беретін клубтар мен үйірмелер жұмыс істейді.

Мемлекет басшысына орталықтағы кәсіби бағдарлау кабинетінің және авиамодельдеу, виртуалды зертхана, баламалы энергия көздері секілді үйірмелердің жұмысы таныстырылды.

Орталықты аралап көру барысында Мемлекет басшысы жеткіншектермен әңгімелесіп, оларды бүгінгі мерекесімен құттықтады. Сондай-ақ, балалардың дарынын, қабілетін дамыту үшін осындай орталықтар өте қажет екенін айтты.

Президент балалар өздеріне ұнаған іспен айналысса, өмірде үлкен жетістікке жететінін, қоғамда құрметті азамат атанатынын айтып, оларға сәттілік тіледі.

Үшқабатты ғимаратта орналасқан инновациялық шығармашылық орталықта 1000-нан аса бала бір мезгілде түрлі үйірмеге және спорт секциясына қатыса алады. Бұдан бөлек, мұнда психологиялық-педагогикалық түзету, дефектолог, логопед кабинеттері жұмыс істейді, сондай-ақ, 300 орындық көрермен залы, медиакөрме, интерактивті ойын және коворкинг алаңдары бар.

Жаңалықтар | Новости