Мемлекет басшысы мектептен алыс орналасқан балаларды автобуспен қамту, олардың тасымалын қауіпсіз ету мақсатында арнайы тапсырма берген болатын. Президенттің осы тапсырмасы аясында Алматы облысындағы мектептерге 34 автобустың кілті табысталды.
Автобустардың кілтін аудандағы білім бөлімінің басшыларына облыс әкімі табыстады.
Қазіргі таңда облыста 339 мыңнан астам бала білім алады. Халқы тығыз орналасқан аудандардағы 199 елдімекеннің 30 764 оқушысы тасымалдау арқылы оқып жатыр.
Бүгінгі шарада өңір басшысы Еңбекшіқазақ ауданына 5, Жамбыл ауданына 2, Талғар мен Іле ауданына 13-тен, Ұйғыр ауданына 1 автобустың кілтін табыстады.
«Облыстың ең өзекті проблемаларының бірі – оқушылардың тасымалдауын ұйымдастыруда жергілікті жердегі автопарк автобустарының техникалық жағдайының төмендігі болатын. Аталған мәселе шешімін тауып, бүгін міне, «лизингтік қаржыландыру» бағдарламасы аясында мектеп автобустарын табыстап отырмыз. Бүгінгі автокөліктер балалардың игілігіне қызмет етіп, терең білім алудағы жаңа белестерді бағындыруға себепкер болсын демекпін!» – деді Марат Сұлтанғазиев құттықтау сөзінде.
Айта кетейік, автобустарды сатып алуға 2 млрд 272 млн теңге жұмсалған.
