Қазіргі хирургия қарқынды дамып келеді. Осыдан бірнеше жыл бұрын тек ірі республикалық орталықтарда ғана орындалатын көптеген күрделі оталар бүгінде Алматы көпсалалы клиникалық ауруханасында (АККА) сәтті жүзеге асырылуда.
«IAMS» ЖШС-нің бас директоры Жұмағали Исмаилов хирургиялық қызметті дамыту аурухананың негізгі басым бағыттарының бірі екенін атап өтті.
«Біздің басты мақсатымыз – облыс тұрғындарының өңірден шықпай-ақ ең заманауи медициналық көмекті алуына мүмкіндік жасау.»
2026 жылдың алғашқы алты айының өзінде ауруханада:
- ми мен мойын қантамырларына 40 эндоваскулярлық операция;
- 32 кардиовертер-дефибриллятор имплантациясы;
- ірі буындарды эндопротездеу операциялары;
- есту аппараттарын имплантациялау;
- жүрек қақпақшаларына операциялар;
- кеуде қолқасын эндоваскулярлық протездеу;
- микрохирургиялық тамырлық араласулар;
- күрделі нейрохирургиялық операциялар;
- заманауи технологияларды қолдана отырып жүргізілетін кардиохирургиялық операциялар орындалды.
Бұл көрсеткіштердің артында өз өңірінде жоғары технологиялық медициналық көмекке қол жеткізген жүздеген пациенттің тағдыры тұр.
«Әрбір сәтті аяқталған ота – хирургтердің, анестезиологтердің, орта буын медицина қызметкерлерінің және аурухана ұжымының бірлескен еңбегінің нәтижесі. Дәл осы командалық жұмыс бізге ең күрделі медициналық технологияларды сенімді түрде меңгеруге мүмкіндік береді», – дейді Жұмағали Исмаилов.
Бүгінде Алматы көпсалалы клиникалық ауруханасы жоғары технологиялық медициналық қызметтердің (ЖТМҚ) түрлерін кеңейтуді жалғастырып, заманауи технологиялар, дәрігерлердің кәсібилігі және тиімді басқару үлгісі үйлескен еліміздің жетекші көпсалалы медициналық орталықтарының бірі ретіндегі өз ұстанымын нығайтып келеді.