Желіде Беларусьтен келген туристердің видеосы таралуда. Олар қазақстандық полицейлер өздерінен 200 мың теңге талап еткенін мәлімдеді. Бұл жағдайға өңірлік ПД пікір білдірді.
Видеодан белгілі болғандай, блогер бар саяхатшыларды Түркістан облысында патрульдік полиция қызметкерлері тоқтатқан.
Туристердің айтуынша, олардан қазақстандық техникалық тексерістің жоқтығы және бейнекамераға түсіп қалғаны үшін 200 мың теңге сұралған. Алайда олардың ереже бұзбағанын және ешқандай дәлел ұсынылмағанын айтады.
“Біз көп қарсылық көрсеткен жоқпыз. Жай ғана ақшаны беріп, жолымызды жалғастырдық,” – деді блогер.
Бұл оқиғаға Түркістан облысының ПД түсініктеме берді. Ведомствоның мәліметінше, әлеуметтік желілерге мониторинг жүргізу барысында Шымкент – Самара тас жолында болған оқиғаның видеосы анықталған. Видеода патрульдік полиция қызметкерлерінің қатысуы мүмкін екені болжануда.
“Қазіргі уақытта тексеріс жүргізілуде. Мүмкін болатын жәбірленушілерден ресми арыз түспеген, сондай-ақ көлік құралының тіркеу деректері анықталған жоқ,” – деп хабарлады өңірлік ПД.
Ведомство сондай-ақ ІІМ-нің құқық қорғау органдарына деген сенімге нұқсан келтіруі мүмкін кез келген жағдайға қатаң және принципті түрде әрекет ететінін мәлімдеді.
*“Аталған факті бойынша қылмыстық іс қозғалды. Сонымен қатар, тиісті бөлімшенің басшылығына қатысты қызметтік тексеру басталды. Кінәлілер заңға сәйкес жауапқа тартылады.
Осындай жағдайлардың алдын алу мақсатында патрульдік жасақтардың жұмысына бақылау күшейтілді. Қатарды тазарту және сыбайлас жемқорлыққа қарсы күрес министрліктің басты басымдықтарының бірі болып қала береді.
Белсенді азаматтық ұстаным танытқаны үшін азаматтарға алғысымызды білдіреміз және конструктивті диалогқа әрдайым ашықпыз,”* – деп мәлімдеді ведомство.
Өткен жылы әлеуметтік желілерде Алматы полиция қызметкерлеріне ақша беру фактісі түсірілген видео тараған болатын. Антикоррупциялық қызмет шетелдік азаматқа әкімшілік шара қолданбау үшін пара алу фактісі бойынша сотқа дейінгі тергеу тіркеген.
Сондай-ақ, былтыр Қазақстанда полицейлерді сатып алуға әрекеттенгені үшін 70 қылмыстық іс қозғалды. Осыған байланысты ІІМ арнайы мәлімдеме жасады.
Назар аударыңыз! Бейнежазбада балағат сөздер бар!