Біріккен Ұлттар Ұйымының Тұрақты даму мақсаттарының 4-бағыты – «Сапалы білім» аясында 2026 жылғы 23 қаңтар күні Қонаев қаласындағы Мәдениет үйінде Алматы облысының прокуратурасы ұйымдастыруымен «Заң мен тәртіп» тақырыбында профилактикалық бағыттағы кездесу өткізілді.
Аталған кездесу жастар арасында құқық бұзушылықтардың алдын алу, құқықтық сауаттылықты арттыру, заң талаптарын сақтау мәдениетін қалыптастыру және құқықтық тәртіпті нығайту мақсатында ұйымдастырылды. Жиынға прокуратура органдарының өкілдері, құқық қорғау саласының қызметкерлері, сондай-ақ әл-Фараби атындағы Қазақ ұлттық университетінің Заң факультетінің студенттері мен оқытушылары қатысты.
Кездесу барысында құқықтық тәрбие және профилактика бағытындағы өзекті мәселелер қарастырылды. Атап айтқанда, жастар арасында жиі кездесетін әкімшілік және қылмыстық құқық бұзушылықтардың түрлері, олардың құқықтық салдары, сондай-ақ заң талаптарын сақтамаудың жауапкершілігі жөнінде түсіндірме жұмыстары жүргізілді. Құқықтық нормалардың қолданылу тәртібі және олардың күнделікті өмірдегі маңызы нақты мысалдар арқылы түсіндірілді.
Сонымен қатар азаматтардың құқықтары мен міндеттері, заң алдындағы жауапкершілік қағидаттары, құқықтық тәртіпті сақтаудың қоғамдық маңызы жөнінде ақпарат берілді. Құқық бұзушылықтардың алдын алу бағытындағы жұмыстардың рөлі мен олардың тиімділігін арттыру жолдарына назар аударылды.
Кездесу аясында қатысушылар құқық қорғау органдарының өкілдеріне тікелей сұрақтар қою мүмкіндігіне ие болды. Заң факультетінің студенттері құқық қолдану тәжірибесіне, профилактикалық жұмыстардың ұйымдастырылу тәртібіне, сондай-ақ болашақта заң саласында қызмет атқаруға қатысты мәселелер бойынша сұрақтар қойды. Берілген жауаптар білім алушылардың кәсіби дайындығын тереңдетуге және құқықтық білімін практикамен ұштастыруға бағытталды.
Кездесу барысында қатысушыларға ақпараттық-профилактикалық буклеттер таратылды. Аталған материалдарда нашақорлықтың алдын алу, есірткі заттарының адам денсаулығына, психологиялық жағдайына және әлеуметтік ортаға тигізетін зияны, сондай-ақ есірткі құралдарына байланысты құқық бұзушылықтар үшін заңнамада көзделген жауапкершілік туралы мәліметтер қамтылды. Бұл ақпараттық материалдар жастардың әлеуметтік қауіп-қатерлер туралы хабардарлығын арттыруға және құқыққа қайшы әрекеттердің алдын алуға бағытталды.
Кездесу қорытындысы бойынша қатысушылар профилактикалық бағыттағы жұмыстардың маңыздылығын атап өтті. Алдағы уақытта да жастарға арналған құқықтық түсіндіру және алдын алу бағытындағы жұмыстарды жүйелі түрде жалғастыру қажеттігі көрсетілді. «Заң мен тәртіп» тақырыбындағы бұл кездесу жастардың құқықтық сауаттылығын арттыруға, құқықтық тәртіпті нығайтуға және жауапты азамат қалыптастыруға бағытталған жоспарлы жұмыстардың бірі ретінде өткізілді.
Әл-Фараби атындағы ҚазҰУ заң факультетінің Қылмыстық құқық, қылмыстық іс жүргізу және криминалистика кафедрасының оқытушылары:
Тұрысбек Р.Б., Дүзбаева С.Б., Избасова А.Б., Сураева К.С., Худайбергенов Ж.Т.