Қонаев қаласында коммуналдық қызметкерлер республикалық референдум күні де өз жұмыстарына жауапкершілікпен қарап, қаланың тазалығын қамтамасыз етуді жалғастырды. Қала көшелерінің санитарлық жағдайын сақтаумен айналысатын қызметкерлер жұмыс уақытын толық аяқтаған соң барып дауыс беруге келді.
Кешкі 17:30-да жұмыс уақыты аяқталғаннан кейін 10-нан астам көше тазалаушы №938 сайлау учаскесіне келіп, ұжым болып өз таңдауларын жасады. Осылайша, олар күнделікті еңбектен кейін де азаматтық белсенділік танытты.
«Жасыл қала Қонаев» коммуналдық мекемесінің басшысы Бақытжан Нұртаев республикалық референдумға қатысу жөнінде өз пікірін білдірді.
– Біздің қызметкерлер таңнан бері қала көшелерінің тазалығын қамтамасыз ету үшін жұмыс істеді. Дегенмен, жұмыс аяқталған соң ұжым болып келіп, дауыс беруді жөн көрдік. Себебі, референдум еңбек адамдары үшін де маңызды күн, – деді ол.
Коммуналдық сала қызметкерлерінің бұл әрекеті қоғам алдындағы жауапкершілік пен еңбек адамдарының азаматтық ұстанымын айқын көрсетті.