Қонаев гарнизонына қарасты 32363 әскери бөлімінде жоспарлы бақылау тексерісі басталды. Бұл туралы гарнизонның баспасөз қызметі хабарлады. Аталған іс-шара бөлімшелердің жауынгерлік әзірлігін жан-жақты бағалауға бағытталған.
Тексеру барысында комиссия жеке құрамның кәсіби даярлық деңгейін, әскери тәртіптің жай-күйін, күнделікті қызметтің ұйымдастырылуын, сондай-ақ техника мен қару-жарақтың қойылған міндеттерді орындауға дайындығын саралауда. Бұл – бөлімшенің жалпы әлеуетін айқындайтын маңызды кезеңдердің бірі.
Бақылау барысында бөлімшелердің өзара үйлесімді іс-қимылына ерекше назар аударылуда. Сонымен қатар жауынгерлік даярлық нормативтерінің орындалуы мен қауіпсіздік талаптарының сақталуы жіті қадағаланып отыр. Әскери қызметшілер дене дайындығы бойынша нормативтерді (ФИЗО) тапсырып, өздерінің төзімділігі мен күш-қуатын, жалпы физикалық әзірлігін көрсетуде.
Іс-шара аясында түрлі сабақтар, жаттығулар және бақылау тапсырмалары өткізіліп, жеке құрамның дайындығы кешенді түрде бағалануда. Бұған қоса материалдық-техникалық базаның жай-күйі, әскери қызметшілердің орналасу жағдайы мен тылдық қамтамасыз ету жүйесі де тексерілуде.
Жауынгерлік даярлық бөлімінің аға офицері, гвардия капитаны Бекжігіт Омарбековтің айтуынша, мұндай бақылау тексерісі – әскери бөлім қызметінің деңгейін нақты бағалауға мүмкіндік беретін маңызды кезең.
«Бақылау тексерісі – жеке құрамның қазіргі дайындық деңгейін айқындап қана қоймай, алдағы даму бағыттарын анықтауға жол ашады. Басты міндет – бөлімшелердің кез келген жағдайда қойылған міндеттерді орындауға жоғары дайындықта болуын қамтамасыз ету», – деді ол.
Тексеру қорытындысы бойынша әскери бөлім қызметіне кешенді баға беріліп, алдағы уақытта жетілдіруді қажет ететін бағыттар айқындалады. Сонымен қатар қызметтік және жауынгерлік даярлықтың тиімділігін арттыруға бағытталған нақты ұсыныстар әзірленбек.
Ерлік Кебекбай