Қазақстан Республикасының күні – егемен еліміздің тәуелсіздігін, жеткен жетістіктерін дәріптейтін ерекше мереке. Бұл күнде мемлекетіміздің абыройын асқақтатып, оның дамуына сүбелі үлес қосып жүрген азаматтарымыз жайында әңгіме өрбіту әрдайым маңызды. Мұндай тұлғалардың қатарында Қонаев қаласының дарынды жастары ерекше орын алады. Олар білім мен ғылымда, спортта биік белестерді бағындырып, туған елінің абыройын асырып жүр.
Қонаев қаласы – талантты, зерделі жастардың ордасы. Бұл қаладан шыққан жас дарындар өздерінің білімге, ғылымға және спортқа деген ұмтылыстарымен еліміздің дамуына үлес қосып келеді. Мәселен, XIX республикалық «Зерде» байқауында ІІ орынды жеңіп алған Свиргоцкая София, Дерягина Таисия және Қойшыман Айзере жас ұрпақтың ғылыми-зерттеу саласындағы мүмкіндіктерін паш етті. Ал Қайрат Әлия ІІІ орынға ие болып, өзінің ерекше шығармашылық қабілеттерін дәлелдеді. Бұл жеткіншектердің ізденісі мен талпынысы Қонаев қаласының білім беру саласының жоғары деңгейде екенін айғақтайды.
Сондай-ақ жалпы білім беретін пәндер бойынша республикалық олимпиадада Синельникова Мария, Бейсембай Алижан, Бейсенгалиева Нуриля мен Сердалы Елнұр ІІ және ІІІ орындарға ие болып, өз білімдерінің тереңдігін көрсетті. Тәңірберген Әлияның республикалық «Ілияс оқулары» байқауында ІІ орынға қол жеткізуі – оның әдебиетке деген сүйіспеншілігінің жарқын көрінісі. Бұл жастардың жетістіктері туған қаласының мерейін асқақтатып қана қоймай, олардың ұлтымыздың рухани және білім беру деңгейіне қосқан зор үлесін көрсетеді.
Қонаев қаласының спорттағы жас саңлақтары да өздерінің тынымсыз еңбектерімен биік тұғырлардан көрінуде. Мәселен, Мейрамгүл Ахметжан әйелдер күресі бойынша ел намысын қорғап жүрген жас спортшы. 2008 жылы дүниеге келген ол күреске деген ерекше қызығушылығымен көзге түсіп, көптеген маңызды жарыстарда жоғары нәтижелерге қол жеткізді. 2023 жылы Мейрамгүл Иорданияда өткен Азия чемпионатында 15 жасқа дейінгі жасөспірімдер арасында 46 кг салмақта қола жүлде иеленді, ал Қырғызстанда өткен Азия чемпионатында 17 жасқа дейінгі спортшылар арасында 5-орынға ие болды. Түркияда өткен әлем чемпионатында 17 жасқа дейінгі санатта 5-орын алғаны оның шеберлігі мен табандылығын айқын дәлелдейді. 2024 жылы Қазақстан Республикасының чемпионатында 1-орынға қол жеткізген Мейрамгүл өз саласында үздік екенін тағы да көрсетті.
Мейрамгүлдің табыстарының артында оның жаттықтырушысы Бекболсынов Болат Шерғалиевичтің қажырлы еңбегі тұр. Жаттықтырушының қолдауымен және кәсіби жетекшілігімен Мейрамгүл халықаралық аренада жоғары деңгейде өнер көрсетіп, Қазақстанның атын шығарып келеді.Спорт әлемінде Қонаев қаласынан шыққан тағы бірқатар жас таланттар ел намысын абыроймен қорғап келеді. Атап айтсақ, Устинов Данил, Кадылханқызы Арна, Касимов Тойрат, Попов Данил және Польшин Всеволод Азия және әлем чемпионаттарында жеңіс тұғырынан көрініп, Қазақстанның абыройын асқақтатуда. Олардың әрқайсысы жастардың арасындағы спорттың дамуына ықпал етіп, өздерінің қажырлы еңбектерімен спорт саласының көкжиегін кеңейтіп жүр.
Қонаев қаласының осындай білімді де өнерлі, спортқа жақын жастары тәуелсіз Қазақстанның мақтанышына айналып отыр. Олардың әрбір жетістігі – туған елдің даңқын аспандатып, Қазақстанның болашағының жарқын екенін дәлелдейді. Тәуелсіз елдің тұлғалары ретінде бұл жастар өздерінің қажырлы еңбектерімен алдыңғы толқын ағаларға лайықты ізбасар болып, келешекте елдің игілігіне мол үлес қосатыны сөзсіз. Қазақстанның көк байрағын биікке көтеріп, оны әлемдік аренада абыроймен танытып жүрген бұл жастар – ел болашағының символы.
Инақынова Назерке
