Ұстаз – ұлттың болашағының іргетасын қалаушы. Қазақтың ұлы ағартушысы Ыбырай Алтынсарин: «Маған жақсы мұғалім бәрінен де қымбат, өйткені жақсы мұғалім – мектептің жүрегі» – деп, ұстаздардың білім мен тәрбиедегі рөлін ерекше бағалаған. Бүгінгі күнде де мұғалімдер қоғамның дамуына, ұрпақтың тәрбиесіне және болашаққа бағыт көрсетуіне зор үлес қосуда.
Ұстаз еңбегінің маңыздылығы ғасырлар бойы айтылып келеді. Ұлы ойшыл Абай Құнанбайұлы да: «Адамның адамшылығы – жақсы ұстаздан» деп, адамгершілік пен парасаттың негізі мұғалімдер арқылы қалыптасатынын айтқан. Ұстаздар тек білім беріп қана қоймайды, олар қоғамның моральдық және рухани тірегін қалыптастырады, болашақ ұрпақты өмірге дайындап, бағыт көрсетеді. Әрбір шәкіртке жол сілтейтін шамшырақ іспетті ұстаздар, тек мектеп қабырғасында ғана емес, қоғамның дамуына тікелей ықпал ететін маңызды тұлғалар.
Мұғалімдер – тек білім беруші емес, олар болашақ ұрпаққа дұрыс құндылықтарды сіңіруші, әлемге ашылған терезені көрсетуші. Олардың еңбегі әр адамның өмірінде маңызды із қалдырады. Осы орайда, Әл-Фараби де: «Тәрбиесіз берілген білім – адамзаттың қас жауы» деп, білім мен тәрбиенің ажырамас бірлігін көрсеткен.
Қазіргі заманда ұстаздар сан қилы өзгерістер мен инновацияларды қабылдап, балаларға заман талабына сай білім беруге тырысуда. Олар тек пәндерді оқытумен шектелмей, әрбір оқушының жеке қабілеттерін дамытумен айналысады, соның арқасында білім беру сапасы артып, қоғамның интеллектуалдық деңгейі өседі. Мұғалімдер жаңа әдістемелерді меңгеріп, ақпараттық технологияларды қолданып, оқыту үдерісін қызықты әрі қолжетімді ету үшін үздіксіз еңбек етуде.
Ұстаздар күні – бұл қоғамымыздағы ең құрметті мамандықтың бірін атап өтетін ерекше мереке. Бұл күні мұғалімдердің ерен еңбегі жоғары бағаланып, оларға көрсетілген құрмет пен алғыс ерекше байқалады. Жыл сайын ұстаздар күніне арналған салтанатты шаралар өткізіліп, үздік ұстаздар марапатталады.
3-қазанда Қонаев қаласының мәдениет үйінде өткен «Ұстаз – ұлт келбеті» атты салтанатты шара ұстаздарға арналған үлкен құрмет пен шынайы алғысқа толы болды. Мұғалімдер күніне арналған бұл мерекелік жиын ұстаздардың білім беру саласындағы өлшеусіз еңбегін мойындаудың жарқын көрінісіне айналды.
Қала әкімі Асхат Ермекұлы ұстаздарға арнаған құттықтау сөзінде: «Ұлттың болашағы – білімді ұрпақтың қолында, ал білімнің бастауы сіздердің еңбектеріңізде жатыр», – деп, ұстаздардың ұрпақ тәрбиесіндегі рөлін ерекше атап өтті. Әкімнің бұл жүрекжарды сөздері салтанатты жиынға ерекше реңк берді. Асхат Ермекұлы «Ұстаз – ұлттың шамшырағы, жас ұрпаққа жол көрсетуші. Сіздердің еңбектеріңіз – келер ұрпақтың бақытты болашағының кепілі», – деген құттықтау сөздерімен ұстаздарға зор алғыс білдірді.
Шара аясында ұстаздарға арналған концерттік бағдарлама қойылып, өнер ұжымдары ән мен биден шашу шашты. Сонымен қатар, көпшіліктің көңілін тебіренткен тағы бір сәт – шетелде оқып жатқан Қонаев қаласының түлектерінің арнайы видео құттықтауы болды. Олар өздерінің сүйікті ұстаздарына деген ыстық ықыластары мен алғыстарын білдіріп, шет жерде жүрсе де, ұстаздарын ұмытпағандарын айтып өтті.
Салтанатты рәсімде Қазақстан Республикасы Оқу-ағарту министрлігінің «Ы.Алтынсарин» төсбелгісімен марапатталған Қадырғали Жалайыр атындағы №6 орта мектептің қазақ тілі мен әдебиеті пәнінің мұғалімі Бану Рахымбердіқызының есімі көпшіліктің ерекше ықыласына бөленді. Бұл марапат оның жас ұрпақты оқыту мен тәрбиелеудегі еңбегінің жоғары бағалануын көрсетті.
Сонымен қатар, Қонаев қаласындағы бірнеше білім беру мекемелерінің басшылары мен мұғалімдері Тәуелсіз Қазақстанның рухани және әлеуметтік дамуына қосқан зор үлесі мен қол жеткізген табыстары үшін Қазақстан Республикасы Оқу-ағарту министрлігінің Құрмет грамотасымен марапатталды. Марапатталған ұстаздар арасында №2 орта мектептің директоры Руфина Каркеновна, тарих пәнінің мұғалімі Зияда Амангелдіқызы, «Асау-барақ» жекеменшік мектеп директоры Назира Раисова және көптеген басқа да білім беру саласының өкілдері болды. Олардың әрқайсысы өз ісінің нағыз шеберлері ретінде ел алдында құрметке ие болды.
Сондай-ақ, Алматы облысы әкімінің алғыс хатымен «Балбөбек» жекеменшік балабақшасының меңгерушісі Нәсіпкүл Тұрлықожаева марапатталды. Қонаев қаласының әкімі Асхат Ермекұлының Құрмет грамотасымен №3 орта мектептің бастауыш сынып мұғалімі Бақыт Алтағаева, Ш.Уәлиханов атындағы №2 гимназияның бастауыш сынып мұғалімі Любовь Погадаева, Қадырғали Жалайыр атындағы №6 орта мектептің математика пәні мұғалімі Самал Жаңғатаева және басқа да өз ісінің озықтары марапатталды.
Ұстаздар қауымы тек білім ғана емес, рухани құндылықтар мен адамгершіліктің жаршысы. Мерекелік жиында әрбір ұстаздың еңбегі еленіп, ерекше ықыласпен атап өтілді. Шәкірттерін білім нәрімен сусындатып, олардың жүрегіне ізгілік пен парасаттылықтың дәнін егетін ұстаздардың мәртебесі осы күні тағы бір биік белеске көтерілді.
Бұл шара ұстаздар қауымына көрсетілген терең құрметтің және олардың ел болашағына қосқан елеулі үлесінің жарқын символына айналды. Ел болашағы үшін аянбай еңбек етуге ниет білдірген ұстаздар бұл күні ерекше мақтанышпен атап өтілді.
Біз де, редакция ұжымының атынан ұлағатты ұстаздарды шын жүректен құттықтап, еңбектеріне жеміс, дендеріне саулық, бай-қуатты болуларын тілейміз.
Назерке Инақынова
