Ұяңнан ұшырдың ғой сан дараны
Өзіңсің талайлардың арман-әні
Қазақтың қасиетті шаңырағы
ҚазҰУ-ым арманымның бастамасы!
Әл-Фараби атындағы ҚазҰУ – студенттерінің кемел келешегінің кепілі. Абай атамыздың қара сөзінде: «Тегінде, адам баласы адам баласынан ақыл, ғылым, ар, мінез деген нәрселермен озбақ» — делінген. Аталған ой түйіні бүгінгі күннің өзегі болып табылады. Ақыл, ғылымды дамытуда университетте еліміздегі мықты зерттеу мәдениетінің іргетасы қалыптасты деуге болады. Елімізде ғылым саласында айшықты орынға ие ғалымдар мен зерттеушілердің көпшілігі универститет түлегі болып табылады. Әл-Фараби атындағы ҚазҰУ-дың кемел келешек кепілі болуының тағы бір себебі – оның ғылыми-зерттеу мен инновацияға қатты көңіл бөлуінде. Университетте әртүрлі салалардағы білімді жетілдіруге арналған бірнеше ғылыми орталықтар құрылды. Бұл орталықтарда алдыңғы қатарда жүрген жетекші ғалымдар мен зерттеушілер қызмет етеді. Олар өз жұмыстары арқылы бүгінгі қоғам алдында тұрған ең өзекті міндеттерді шешуге көмектесуде. Университет оқытушылары мен студенттерін қоғамға маңызды әсер ете алатын ғылыми-зерттеу қызметімен айналысуға шақырады.
Мемлекет басшысының әлемнің үздік топ-ЖОО рейтингісіне ену тапсырмасын тыңғылықты орындап отырған ҚазҰУ ұжымы білімге негізделген экономиканың белсенді субъектісіне айналмақ. Ендеше жетістік деген осы болар! Киелі шаңырағымыз 90 жылдық аса бай тарихымен университет Қазақстанның жетекші классикалық университеті мәртебесіне ие Қазақстан білімі мен ғылымының ірі орталығы, жоғары кәсіби, жоғары оқу орнынан кейінгі білім мен ғылымның инновациялық дамуының ұлттық көшбасшысы. Мерейің үстем, болашағың жарқын бола берсін- ҚазҰУ!
Білімнің қайнар ошағы болып отырған қара шаңырақ заманауи білім беруден де қалыс қалып жатқан жоқ. Әлемдік озық елдерге студенттеріміз барып оқып келіп тәжірибе жинап университетте дуалды жүйе де қалыптасып теория мен практиканы қатар дамытып жатыр. Оқимын деген әрбір тұлғаға жан-жақты көмек пен мүмкіндік жетерлік. Танымал профессорлар мен білімді ұстаздардан білім алған студенттеріміз жақсы жерлерде қызмет атқарып жүрген жандар аз емес. ҚазҰУ білім мен тәрбиенің ошағы, қара шаңырақтан білім алған әрбір тұлға мемлекет болашағы. Тарихы тереңде жатқан қаладағы тарихи университетім менің саған алғысым шексіз!
Авторлары: з.ғ.к., доцент – Мынбатырова Н.К.
Заң факультетінің 2 курс магистранты Темирхан Аружан
