Израиль ХАМАС тарапынан босатылатын тұтқындардың тізімін алмағандықтан, бітімнің басталуын кейінге қалдырды. ХАМАС мұны «техникалық себептермен» түсіндірді. Израиль мен палестиналық ХАМАС тобы арасында жасалған бітім туралы келісім бүгін таңертең күшіне енуі керек еді, бірақ Израиль тарапы тұтқындардың босатылатыны туралы тізімді алғанға дейін басталмайтыны мәлімделді. Бұл туралы премьер-министр Биньямин Нетаньяхудың кеңесшісі Дмитрий Гендельман хабарлады.
«Премьер-министр Биньямин Нетаньяху түнде қауіпсіздік мәселелері бойынша кеңес өткізді, онда босатылатын тұтқындардың тізімін алудағы кідіріс талқыланды. Премьер-министр ЦАХАЛ-ға (Израиль қорғаныс армиясы) 8:30-да күшіне енуі тиіс болған бітімнің тұтқындар тізімі алынғанға дейін басталмауын тапсырды», – делінген Telegram-арнасында жарияланған хабарламада.
Тұтқындардың тізімі туралы келіспеушілік
Times of Israel басылымының хабарлауынша, бүгін үш әйел тұтқын босатылуы тиіс болған, алайда Израиль шенеуніктерінің айтуынша, ХАМАС олардың аттарын 18 қаңтар күні хабарлауы керек еді. Келісім бойынша, топ тұтқындардың тізімін босатылудан 24 сағат бұрын беруі қажет болған. Тұтқындардың босатылуы жергілікті уақытпен 16:30-ға жоспарланған.
ХАМАС тізімді берудегі кідірісті «техникалық себептермен» түсіндірді. Нетаньяхудың мәлімдемесінен кейін ХАМАС бұл жағдайға қатысты өз ұстанымын білдіріп, бітім шарттарын орындауға дайын екенін мәлімдеді.
Израиль соққыларды қайта жалғастырды
РИА Новости хабарлағандай, Израиль қорғаныс армиясы (ЦАХАЛ) Газа секторындағы палестиналық радикалдардың нысандарына соққылар жасауды жалғастырды.
«ЦАХАЛ қазір де әрекет етуді жалғастырып, Газа секторындағы лаңкестік нысандарға шабуыл жасауда. Біраз уақыт бұрын Газа секторының солтүстігі мен орталығындағы бірнеше нысан артиллериялық және әуе шабуылына ұшырады. ЦАХАЛ ел тұрғындарының қауіпсіздігіне зиян келмеуі үшін қорғануға және шабуылға дайын», – делінген Израиль армиясының хабарламасында.
Соққы нәтижесінде Газа секторында 8 адам қаза тауып, 25 адам жараланғаны хабарланды.
Келіссөздер және бітім туралы келісім
Израиль мен ХАМАС арасындағы келіссөздер бірнеше айлық тығырықтан кейін қайта жанданып, 34 израильдік тұтқынның босатылуы мен Газадағы бітім туралы келісімге қол жеткізуге үміт пайда болған еді.
Катар бұл келіссөздерге делдал болып, ХАМАС пен Израиль өкілдерімен жеке кездесулер өткізді. Келісім туралы жаңалықты Газа тұрғындары мен көптеген израильдіктер қуанышпен қабылдады. Палестиналықтар үшін бұл бомбалаулардың тоқтауы мен жүздеген мың көшіп-қонған адамдардың үйлеріне оралуын білдірсе, Израиль тұрғындары үшін тұтқындардың босатылуы үлкен жеңіс ретінде қабылданды.
Алайда бітім шарттарының орындалуы 19 қаңтарға жоспарланғанымен, ХАМАС тарапынан тізімнің уақытында берілмеуі бұл процесті тежеді.