Қазақстан Республикасының Президенті Қасым-Жомарт Тоқаевтың Қазақстан жыл сайынғы маңызды қадамдарды көрсетіп, ел дамуына негізделген жұмыстарды жүктейтін Жолдауын зор ықыласпен тыңдағандардың қатарында болдым. Мемлекет басшысының осы жолғы «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауы цифрлы трансформация мен әлеуметтік жаңғыруды үйлестіре отырып, еліміздің болашағын айқындайтыны сөзсіз. Цифрландыру халыққа қызметті қолжетімді ету үшін керек болса, жасанды интеллект өмірді жеңілдету үшін қажет.
Елді үш жыл ішінде толық цифрлы мемлекетке айналдыру міндеті қойылуының уақыт талабынан туындап отырғаны анық. Бұл еліміздің ұлттық қауіпсіздігі мен экономикалық тұрақтылығын қамтамасыз етудегі маңызды қадам болмақ. Қасым-Жомарт Кемелұлының жасанды интеллект саласына арнайы министрлік құру туралы бастамасы елдің технологиялық тәуелсіздігін нығайтып, инновациялық дамуға серпін беретіні сөзсіз. Сондай-ақ Цифрлық кодекс қабылданатыны – технологиялық дамудың бағытын анықтайтын стратегиялық қадам. Жасанды интеллект қазірдің өзінде медицинадан бастап білім, ауыл шаруашылығы салаларында да қолданыла бастады.
Мемлекет басшысы Жолдауда жастарға қатысты көтерген маңызды мәселенің бірі – оқу гранттарының тиімділігі. Жыл сайын жоғары оқу орындарын бітірген жастардың көпшілігі мамандығы бойынша жұмыс істемейді. Осы бір олқылықты жою мақсатында Президент еңбек нарығына қажет мамандықтарға ғана грант бөлуді, техникалық және жұмысшы мамандықтар мәртебесін көтеруді, түлектердің нақты жұмысқа орналасуын қадағалауды тапсырды.
Жолдауда ауыл шаруашылығын дамыту бағытында атқарылатын жұмыстар нақтыланып, су ресурстарын тиімді пайдалануға байланысты тың идеяны жүзеге асыру қажеттігі айтылды. «Қазір құзырлы органдарда еліміздегі су ресурстарының қолжетімді көлемі туралы нақты мәлімет жоқ. Кейбір каналдағы судың 50-60 пайызы далаға кетуде. Суды есепке алу технологиясы әбден ескірген. Суды бөліп тарататын орындарда қазіргі заманға сай құрылғылар жоқ. Шын мәнінде, су – стратегиялық маңызы бар ресурс, сусыз өмір жоқ. Сондықтан бұл сала ұлттық цифрлық жаңғыру жұмысындағы басты бағыттың бірі болуға тиіс», – деді Қасым-Жомарт Тоқаев. Бұл жағдай – Қонаев қаласына қарасты Шеңгелді аймағына тән құбылыс. Дегенмен кейінгі кезде суды үнемдеу және тиімді пайдалану мақсатында тамшылатып және жаңбырлатып суару технологиясы қолданылуда. Қолға алынған бастаманың тиімділігіне шеңгелділік диқандардың да көзі жетіп келеді. Сондықтан жылдан-жылға оның көлемі кеңейте түсетіні анық.