Жастар мен полиция есірткі насихатына қарсы күш біріктірдіҚарасай ауданында «Заң мен тәртіп» қағидаты аясында жастардың белсенді қатысуымен нашақорлықтың алдын алуға бағытталған «Антиграффити» акциясы өтті. Іс-шараны Қарасай аудандық полиция басқармасы, аудандық жастар саясаты бөлімі және Іргелі ауылдық округінің жастары бірлесіп ұйымдастырды.Акцияның негізгі мақсаты – қоғамдық орындарда кездесетін есірткі құралдарын жарнамалайтын заңсыз жазулар мен граффитилерді жою, жастар арасында зиянды әдеттердің таралуына тосқауыл қою және қауіпсіз қоғамдық орта қалыптастыру.Іс-шара барысында еріктілер мен құқық қорғау органдарының қызметкерлері елді мекен аумағындағы ғимараттар мен қоршауларға салынған есірткі жарнамалары мен күмәнді интернет-ресурстардың мекенжайларын анықтап, оларды толықтай өшірді. Мұндай заңсыз жазбалар жастарды есірткі айналымына тартудың бір құралы болғандықтан, оларды жою профилактикалық жұмыстың маңызды бөлігі болып саналады.Сонымен қатар акция аясында жастармен түсіндіру кездесулері өткізіліп, есірткі заттарының адам денсаулығына, психологиялық жағдайына және болашағына тигізетін зияны туралы кеңінен ақпарат берілді. Қатысушылар зиянды әдеттердің салдары, заң алдындағы жауапкершілік және салауатты өмір салтын ұстанудың маңызы жөнінде пікір алмасты.Ұйымдастырушылардың айтуынша, мұндай шаралар жастардың құқықтық сауаттылығын арттырып қана қоймай, олардың қоғамдағы өз жауапкершілігін сезінуіне де ықпал етеді. Сондай-ақ жастарды қоғамдық тәртіпті сақтауға, қоршаған ортаға бейжай қарамауға және заң талаптарын құрметтеуге тәрбиелейді.Бүгінде есірткіге қарсы күрес тек құқық қорғау органдарының міндеті емес, ол – бүкіл қоғамның ортақ ісі. Сондықтан жастардың осындай бастамаларға белсенді қатысуы қоғамда құқықтық мәдениетті қалыптастыруға және қауіпсіз орта құруға үлкен үлес қосады.Ұйымдастырушылар алдағы уақытта да жастардың қатысуымен профилактикалық және ақпараттық акцияларды тұрақты түрде өткізіп, «Заң мен тәртіп» қағидаттарын кеңінен насихаттауды жалғастыратынын атап өтті.
