Қонаев қаласындағы ASP Arena кешенінде өткен әйгілі «Ленинград» тобының концерті жоғары деңгейде ұйымдастырылып, қоғамдық қауіпсіздік пен тәртіпті қамтамасыз етуге ерекше назар аударылды. Мыңдаған көрермен жиналған мәдени-көпшілік іс-шара барысында құқық қорғау органдары күшейтілген режимде жұмыс істеп, тұрғындар мен қала қонақтарының қауіпсіздігін қамтамасыз етті.
«Заң мен Тәртіп» қағидаты аясында ұйымдастырылған қауіпсіздік шараларына Қонаев және Алатау қалаларынан 300-ден астам полиция қызметкері мен Ұлттық ұлан сарбаздары жұмылдырылды. Олар концерт өтетін аумақты, кіріп-шығу бекеттерін және оған іргелес аумақтарды бақылауда ұстап, қоғамдық тәртіптің сақталуын қадағалады.
Іс-шара барысында полиция қызметкерлері адамдар көп шоғырланған орындарда қауіпсіздікті қамтамасыз етіп қана қоймай, құқық бұзушылықтардың алдын алу бағытында профилактикалық жұмыстар жүргізді. Концертке келген азаматтардың емін-еркін демалып, мәдени кештен жағымды әсер алуына барлық жағдай жасалды.
Сонымен қатар ювеналды полиция қызметкерлері, қалалық білім бөлімі мен ішкі саясат бөлімінің өкілдері бірлесіп арнайы рейдтік іс-шаралар ұйымдастырды. Рейдтердің басты мақсаты – кәмелетке толмаған жасөспірімдердің түнгі уақытта заңды өкілдерінсіз жүруінің алдын алу және олардың қауіпсіздігін қамтамасыз ету болды. Жауапты мамандар жастармен түсіндіру жұмыстарын жүргізіп, заң талаптарын сақтау мен қоғамдық тәртіпке бағынудың маңыздылығын түсіндірді.
Қоғамдық қауіпсіздікті қамтамасыз ету бағытында атқарылған кешенді жұмыстардың нәтижесінде концерт барысында ешқандай құқық бұзушылық тіркелген жоқ. Бұл құқық қорғау органдарының үйлесімді жұмысы мен тұрғындардың мәдениеті жоғары деңгейде болғанын көрсетеді.
Мамандардың айтуынша, бұқаралық іс-шараларда қауіпсіздікті қамтамасыз ету – құқық қорғау органдарының ғана емес, әрбір азаматтың ортақ міндеті. Қоғамдық орындарда тәртіп сақтау, заң талаптарын орындау және айналадағы адамдарға құрметпен қарау қауіпсіз қоғам қалыптастырудың негізгі қағидаттарының бірі болып табылады.
Бүгінде Қонаев қаласында «Заң мен Тәртіп» қағидаты аясында түрлі профилактикалық және түсіндіру шаралары тұрақты түрде ұйымдастырылып келеді. Мұндай жұмыстар тұрғындардың құқықтық мәдениетін арттыруға, қоғамдық тәртіпті нығайтуға және қауіпсіз орта қалыптастыруға бағытталған.
Қала тұрғындары мен қонақтары үшін ұйымдастырылған мәдени іс-шараның жоғары деңгейде әрі қауіпсіз өтуі құқық қорғау органдарының кәсібилігі мен мемлекеттік мекемелердің бірлескен жұмысының нәтижесі болды.
Шолпан Аралқызы