Қазақстан Президенті Қасым-Жомарт Тоқаев «Абу-Даби тұрақты даму апталығы» халықаралық саммитінде Нигерия Федеративті Республикасының Президенті Бола Ахмет Тинубумен кездесу өткізді, деп хабарлайды nurlyolke.kz Ақордаға сілтеме жасап.
Кездесу барысында Қасым-Жомарт Тоқаев Африка құрлығының ең ірі экономикасы және халқы тығыз қоныстанған елдерінің бірі Нигериямен жан-жақты ынтымақтастықты нығайтуға Қазақстан ерекше мән беретінін атап өтті.
Өз кезегінде Нигерия Президенті Бола Ахмет Тинубу екі ел арасындағы қарым-қатынасты жаңа деңгейге көтеру мақсатында бірлескен жұмысқа дайын екенін білдірді.
Келіссөз барысында Қасым-Жомарт Тоқаев Нигерия көшбасшысын Қазақстанға ресми сапармен келуге шақырды.
Екі ел басшылары сауда-экономика, көлік-логистика, энергетика және ауыл шаруашылығы салаларындағы ықпалдастықты дамыту мүмкіндіктерін талқылап, халықаралық деңгейдегі өзекті мәселелер бойынша пікір алмасты. Сондай-ақ көпжақты құрылымдар аясындағы байланыстарды жандандырудың маңыздылығын атап өтті.