Халықаралық балаларды қорғау күні мен оқушылардың жазғы демалыстағы қауіпсіздігін қамтамасыз ету үшін Арыс ауданының полицейлері «Қауіпсіз маршрут» тақырыбында танымдық іс-шара өткізді. Мақсат — оқушылардың жолда жүру мәдениетін арттыру.
Шара барысында балаларға көрнекіліктер арқылы жол белгілері мен бағдаршамның маңызы туралы ақпарат берілді. Сондай-ақ полиция қызметкерлері балалармен бірге көшеге шығып, қауіпсіз жол өткелінен өту тәртібін тәжірибе жүзінде көрсетті.
Бұл шара оқушылардың жолда қауіпсіз жүріп-тұруына, өмірлік маңызы бар дағдыларды меңгеруіне септігін тигізеді.
Өз кезегінде ата-аналар мен ұстаздар тәртіп сақшыларының тындырымды әрекеттеріне оң пікірлерін айтып, мұндай шаралардың жиі ұйымдастырылуын қолдайтынын жеткізді.
Түркістан облысы ПД баспасөз қызметі