Компания өз жұмысын 2019 жылы бастады. Кәсіпорынның негізін қаптама өндірісі саласында көп жыл еңбек еткен Оксана Николаевна Ошурова қалады. Ол өз тәжірибесіне сүйене отырып, жеке кәсібін ашуға шешім қабылдады. Барлығы шағын қоймадан, бір ғана станоктан, бір кеңседен және 10 адамнан тұратын командадан басталды.
Өндіріс жылусыз әрі толық жағдай жасалмаған жалдамалы ғимаратта орналасты. Соған қарамастан, бұл компанияның дамуына кедергі болған жоқ. Алғашқы күннен бастап команда қораптарды өндіруден бастап, тапсырыстарды тиеу мен жеткізуге дейінгі барлық жұмысты өздері атқарды.
2021 жылғы қиын кезеңнен кейін компания басқаруын толықтай Алина Бирюкова қолға алды. Қиындықтар мен қысымға қарамастан, ол командасымен бірге бизнесті сақтап қана қоймай, оны жаңа деңгейге көтеруге шешім қабылдады.
Алғашқы маңызды қадамдардың бірі — жеке жүк көлігін сатып алу болды. Бұл көлік жалдау шығындарын айтарлықтай азайтуға мүмкіндік берді. Кейін компания жер телімін сатып алып, өз өндірістік базасының құрылысын бастады.
Кәсіпорынның одан әрі дамуына мемлекеттік қолдау айтарлықтай ықпал етті. Компания Алматы облысы «Даму» кәсіпкерлікті дамыту қоры қолдауымен ForteBank арқылы «Өрлеу» бағдарламасы аясында жылдық 12,6% мөлшерлемемен қаржыландыру алды. Қаржыландыру нәтижесінде компания өндірістік цех құрылысын аяқтап, заманауи құрал-жабдықтар сатып алды.
Бүгінде Gofra Box мейрамханаларға, фармацевтикалық компанияларға, жеткізу қызметтеріне және ірі брендтерге арналған гофроқаптама шығарады. Компания клиенттерінің қатарында Magnum Cash & Carry, SMALL, Knauf және басқа да өндірістік кәсіпорындар бар.
Егер бастапқыда компанияда бір кеңсе мен 10 қызметкер ғана болса, бүгінде Gofra Box-та 35 адам жұмыс істейді. Кәсіпорын тұрақты түрде 350–400 шаршы метрге дейін өнім өндіріп, өндірістік қуатын кеңейтуді жалғастырып келеді.
Компания өндіріс сапасы мен жылдамдығына ғана емес, экологиялық жауапкершілікке де ерекше мән береді. Картон қаптамалар қоршаған ортаға қауіпсіз, қайта өңделеді және қайта пайдалануға жарамды.
Бүгінде Gofra Box — өз командасымен және клиенттерімен бірге тұрақты дамып келе жатқан заманауи қазақстандық өндіріс.
«Gofra Box» ЖШС
Тел.: +7 747 274 72 74
Сайт: gofrabox.kz
Пошта: gofrabox.kz@gmail.com
2. Қазақстандағы қауіпсіздік жүйелері нарығында «Эгида Group» компаниясы жиырма жылдан астам уақыт бойы тұрақты жұмыс жасап келеді. Осы уақыт ішінде кәсіпорын шағын монтаждау компаниясынан үздіксіз еңбек пен табандылықтың арқасында өз өндірісі, филиалдары және ТМД елдерінде серіктестері бар ірі компаниялардың біріне айналды.
«Эгида Group» компаниясының негізін қалаушысы әрі бас директоры — Виктор Викторович Гусев. Ол 1977 жылы Қазақстанда дүниеге келген. 1997 жылы Алматы қаласындағы Ішкі істер министрлігінің жоғары техникалық училищесін, ал 2000 жылы ІІМ академиясын тәмамдаған.
Алған білімі мен тәжірибесі оған күзет және өрт қауіпсіздігі жүйелерінің ерекшеліктерін терең түсінуге мүмкіндік берді. 2000-жылдардың басында бұл сала жекеменшік секторда қарқынды дами бастады. Осыны ескерген Виктор Гусев 2002 жылы «Эгида Group» компаниясын ашып, кәсібіні қарқынды дамытуға барын салды.
Алғашқы жылдары компания қауіпсіздік жүйелерін орнатып, оны іске қосуға баса назар аударды. Дегенмен, тұрақты өсу үшін тек жабдықты орнату ғана емес, сонымен қатар қауіпсіздік жүйелерін өндіретін өндірушілермен тікелей қарым-қатынас орнату қажет болды.
Себебі, әр елде делдалдар өте көп және олардан сатып алған тиімсіз болғандықтан, тек өндірушілерден тікелей сатып ала бастады. Бұл сату бөлімін дамытып, өнімнің бағасын тұрақтандырып, нарықтағы тұтынушы тізімін одан әрі көбейтуге жақсы мүмкіндік берді. 2004 жылы Egida Group компаниясы Қазақстан бойынша өрт сөндіру саласындағы ең ірі он компанияның ішіне кірді.
Компанияның өсу тарихына көз жүгіртсек:
• 2006 жылы — жобаларды жүзеге асыратын бағыт құрылып, монтаждау бөлімі жеке компания ретінде құрылды;
• 2008 жылы — жеке мониторинг пульті іске қосылып, Ресей Федерациясында компания ашылды;
• 2009 жылы — көлік-логистика бағыты дамыды;
• 2010 жылы — жеке өндіріс іске қосылды;
• 2011 жылдан бастап — филиалдар желісі кеңейе бастады.
Бүгінде Алматы, Астана, Атырау, Ақтөбе және Шымкент қалаларында компания филиалдары жұмыс істейді. Қазіргі кезде бұл компанияда шамамен 130 қызметкер еңбек етеді.
«Эгида Group» — қауіпсіздік жүйелеріне арналған жабдықтарды жеткізуші ғана емес, сонымен қатар өндіруші компания болып табылады. Компанияның өнім ассортиментіне дабыл жүйелері, бейнебақылау, қолжетімділікті бақылау жүйелері, хабарлама беру құрылғылары, қуат көздері, кабельдік өнімдер және т.б. 100-ден аса өнім түрлері кездеседі.
Өндірісте заманауи технологиялар қолданылады: сандық бағдарламалық басқаруы бар станоктар (CNC), металды плазмалық кесу, штамптау, ұнтақты бояу және басқа да технологиялар. Компания әлемдік үрдістерді тұрақты түрде қадағалап, жаңа технологияларды енгізіп отырады. Соның нәтижесінде, өнім түрлері үнемі ноу-хау, жаңа деңгейде.
Компания дамуындағы маңызды кезеңдердің бірі — мемлекеттік қолдауға ие болуы. 2023–2025 жылдары кәсіпорын 2021–2025 жылдарға арналған кәсіпкерлікті дамыту жөніндегі Ұлттық жоба аясындағы қолдау шараларын пайдаланды. Алматы облысы «Даму» Кәсіпкерлікті дамыту қорының қолдауымен «Береке Банк» АҚ арқылы компания пайыздық мөлшерлеменің бір бөлігін субсидиялау түріндегі мемлекеттік қолдау алды.
Қаражат өндірістің айналым қаражатын толықтыруға және шикізат металды, өрт сөндіру заттарын және басқа да жинақтаушы бөлшектерді сатып алуға бағытталды. Бұл өндіріс көлемін ұлғайтуға, тапсырыстарды орындау мерзімін жеделдетуге және біртіндеп өз өндірісінің үлесін арттыруға мүмкіндік берді. Осылайша, импортқа тәуелділік те қысқара бастады.
«Даму» қорының арқасында бүгінде көптеген құрал-жабдықтарды шетелден алдыртпай, өзіміз өндіре бастадық, бұл бізге өндірісті толығымен бақылап, ішкі процессін одан әрмен түсінуге мүмкіндік берді», — дейді Виктор Гусев.
«Біздің жабдықтар барынша сенімді болуы тиіс, себебі бұл жерде, бірінші кезекте, адамдардың қауіпсіздігі», — дейді ол.
Сонымен қатар өнім ассортименті де кеңеюде: газбен өрт сөндіру жүйелерімен қатар компания су және көбік арқылы өрт сөндіру бағытын да белсенді түрде дамытып келеді.
Бүгінде компания өнімдері тек Қазақстан нарығына ғана емес, сонымен қатар ТМД елдеріне де жеткізіледі.
Алдағы жылдары «Эгида Group» өндіріс көлемін кемінде екі есеге арттыруды, жаңа технологияларды игеруді және жеткізу географиясын кеңейтуді жоспарлап отыр.
Бизнестің ауқымына қарамастан, Виктор Гусев қарапайым қағидаттарды ұстанады:
«Негізгі қағида — алдамау. Сонда сені де ешкім алдамайды». Ал кәсіп ашуды енді қолға алып жатқан кәсіпкерлерге: «Адам жұмыс істеп, дамыған сайын мүмкіндіктер біртіндеп өзінен-өзі пайда болады», — дейді ол.
«Egida Group» компаниясының тарихы – үздіксіз еңбек пен жүйелі жоспардың нәтижесінде, тұрақты әрі бәсекеге қабілетті бизнесті құру мүмкін екенінің айқын көрінісі.
Алматы облысы, Көкөзек ауылы, Қарасу кварталы, 4153 құрылыс
Байланыс телефоны: +7 727 913 10 18
Instagram: egidagroupkz
Электрондық пошта: info@egida.kz
2008 жылы Марат Баққұлов көлемі небәрі 30 шаршы метр болатын гаражда желдеткіш жабдықтарын шығаратын шағын өндіріс ашқанда, оның бірнеше жыл ішінде Қазақстандағы өнеркәсіптік желдету жүйелерінің ірі өндірушілерінің біріне айналатынын ешкім болжай алмаған еді.
Марат Баққұлов – ҚазБСҚА-ның (Қазақ мемлекеттік сәулет-құрылыс академиясы) «Жылумен, газбен жабдықтау және желдету» мамандығы бойынша академия түлегі. Кәсіпкерлікке дейін ғылыми қызметпен айналысып, желдету аэродинамикасы пәнінен дәріс берді және инженер-зерттеуші болып жұмыс істеді. Алайда экономикалық қиын кезеңдерде жеке секторға ауысып, өз кәсібін бастау туралы шешім қабылдады.
Алғашқы тапсырыстар қол еңбегімен орындалды. Екі қызметкерден құралған шағын ұжым Алматы қаласындағы құрылыс нысандарына арналған желдету жүйелері мен өртке қарсы клапандар өндірді. 2008–2009 жылдардағы экономикалық дағдарыс компания үшін күтпеген мүмкіндіктерге жол ашты: импорттық жабдықтарды жеткізу ұзақ уақыт пен жоғары шығындарды талап етсе, жергілікті өнім әлдеқайда жылдам жеткізілетін. Нәтижесінде кәсіпорын алғашқы жылы шамамен 20 млн теңге табыс тапса, екінші жылы бұл көрсеткіш он есеге жуық өсті.
Кәсіпорынның дамуындағы маңызды кезеңдердің бірі «Даму» кәсіпкерлікті дамыту қорымен ынтымақтастық болды. Марат Баққұловтың айтуынша, ол қор қызметімен 2011 жылы, кәсіпорын әлі шағын өндіріс санатында болған кезде танысқан. Компания алғашқы өндірістік жабдықтарының бірін дәл осы «Даму» кәсіпкерлікті дамыту қоры арқылы лизингке алды. 2013 жылы алғашқы ірі өндірістік станок сатып алынып, инвестордың қолдауымен жеке зауыт салынды. 2015–2016 жылдары «Даму» қоры өндіріс көлемін ұлғайтуға және айналым қаражатын толықтыруға қолдау көрсетті. Ал 2021 жылы Алматы облысы бойынша «Даму» кәсіпкерлікті дамыту қорының қолдауымен кәсіпорын қосымша қаржыландыруға қол жеткізіп, өндірісті жаңғырту жұмыстарын жалғастырып, нарықтағы позициясын нығайтты. Бүгінде компания басшылығы қордың отандық өндірісті дамытуға қосқан үлесін жоғары бағалайды және мемлекеттік қолдау бағдарламаларына алдағы уақытта да қатысуды жоспарлап отыр.
Бүгінде «Алматы желдеткіш зауыты» ЖШС (АЖЗ) – өндірістік алаңы шамамен 9 000 шаршы метрді құрайтын және 150-ден астам қызметкер еңбек ететін заманауи кәсіпорын. Зауыт орталық кондиционерлер, ауа алмасу қондырғылары, осьтік және радиалды желдеткіштер, өртке қарсы клапандар және басқа да инженерлік жүйелерді қоса алғанда, өнеркәсіптік желдету жабдықтарының кең түрін шығарады.
Компания Қазақстандағы азаматтық және өнеркәсіптік құрылыс саласының осы бағыттағы қажеттілігінің 70%-ға дейінгі бөлігін қамтамасыз етеді. АЖЗ өнімдері мұнай-газ, энергетика, химия, тамақ, фармацевтика және машина жасау салаларындағы кәсіпорындарда, сондай-ақ мектептерде, тұрғын үй кешендері мен бизнес орталықтарында қолданылады.
Кәсіпорынның ерекше мақтанышы – халықаралық деңгейдегі мойындалуы. АЖЗ ТМД елдері арасында америкалық ASME сертификатын алған жалғыз желдету жабдықтарын өндіруші болып табылады. Бұл сертификат компанияға әлемдік деңгейдегі ірі мұнай-газ жобаларына өнім жеткізуге мүмкіндік береді. Бүгінде кәсіпорын ТШО, NCOC, Қарашығанақ, CNPC және басқа да ірі өнеркәсіптік компаниялармен ынтымақтастық орнатқан.
2024 жылы Оңтүстік Кореяның Hi Air Korea компаниясымен бірлескен жоба іске қосылды. Жоба аясында Қазақстанда жоғары технологиялық өндірісті жергіліктендіру және заманауи инженерлік шешімдерді енгізу көзделген.
Сонымен қатар зауыт өндірісті тұрақты түрде жаңғыртып келеді. Кәсіпорында роботтандырылған желілер, Modula автоматтандырылған қойма жүйесі және заманауи еуропалық жабдықтар енгізілген. Өндірісті жаңғыртуға салынған инвестиция көлемі шамамен 2 млрд теңгені құрады.
АЖЗ тарихы – инженерлік білімнің, кәсіпкердің табандылығының және уақытылы көрсетілген мемлекеттік қолдаудың арқасында шағын гараждық цехтың халықаралық деңгейдегі жоғары технологиялық кәсіпорынға айналғанының жарқын үлгісі. Бүгінде компания өндіріс көлемін ұлғайтып, жаңа нарықтарды игеруді жалғастыруда және «Даму» қорымен ынтымақтастықты одан әрі дамытуға ниетті.
«АЛМАТИНСКИЙ ВЕНТИЛЯТОРНЫЙ ЗАВОД» ЖШС
Ұялы тел: +7 (708) 509-46-19
Пошта: info@avzv.kz
Мекен жайы: Алматы облысы, Іле ауданы, Қоянқұс ауылы, Момышұлы 8 «а» көш.